Dt. 17.03.2025 (Monday):     World Consumer Rights Day, 2025 chu vawin ni khan Food, Civil Supplies & Consumer Affairs Department hmalakna in hlawngtling taka hman ani a. World Consumer Rights Day, 2025  hmanna hi Vanapa Hall, Aizawl ah neih niin, He hun hi Food, Civil supplies & Consumer Affairs Minister Pu B. Lalchhanzova chuan khuallian niin a hmanpui a ni. 

He hun hi Pu Lalchhanhima Sailo chuan kaihruai in, Pi Teresy Vanlalhruaii, Secretary, FCS&CA Deptt hnen atangin he hun hmang tura lokal mipuite lawmna leh duhsakna thu ngaihthlak niin, World Consumer Rights Day lo pianchhuah dan leh a thanchhoh dan te a sawilang bawk a ni.

Tunkum thupui(theme) atana thlanchhuah chu “A Just Transition to Susutainable Lifestyles” tih niin, Dr. James LT Thanga, Professor, Mizoram University chuan kalkhawm mipuite tan a he thupui in a tum leh hriattur pawimawh te chu PPT presentation a pe a. Dr. James-a chuan tunkum thupui atana Sustainability lam hawi an lo hmang chu lawmawm a tih thu leh, kan nitin khawsak dan phungah hian kan ngaih pawimawh hmasak ber tur chu sustainability hi a ni a, thil dang nih phung ti buai lo a, mahni a inchhawm nun zel theihna hi Sustainability chu a ni a ti a. Sustainable lifestyle chu min hual vel tu thing leh mau, tui leh leilung ti chhelo thei ang ber leh kan mihring puite that tlanna leh thangtharte hmakhua thlir ran chunga nitin nun hman hi a ni a, mipuite hian sustainable lifestyle neih hi thil harsa ani lo tih kan hriat angai a, kan nitin nundan phung hi kan bihchian lehzual a, nundan phung tha leh tlo (sustainable lifestyle) kan neih theihna turin tan kan la sauh sauh tur a ni tih thu hmangin mipui kalkhawmte a zirtirin, a chah a ni.

Hemi hnu hian Mizoram Poor Federation hnen atangin Pro-poor Intervention on Ration Card Rationalisation tih thupui hmangin thuchah tawi (short speech) ngaihthlak a ni a. He hunah hian Mizoram Poor Federation President, Pu Lawmthanga chuan kum 2013 atangin National Food Security Act hman ni mahse, sorkar hmasa ten mi rethei te dinhmun a zirchiang ngailo a, mi rethei engemaw zat NFSA hnuaiah kan tel ngailo a ni ati a, ZPM sorkar hnu kum khat lekah sorkar tharin mi rethei te dinhmun zirchiangin, mi rethei tam zawk te NFSA hnuaia card eng leh pawl a dahluh an ni ta chu ropui an ti in, FCS&CA department leh a changtu Minister chu fakawm an tih thu an sawi a ni.

Khuallian Pu B. Lalchhanzova hnen atangin World Consumer Rights hman a nih chhan leh a pawimawhna te ngaihthlak chhunzawm a ni a, Khuallian Pu B. Lalchhanzova a chuan mi zawng zawng hi consumer kan ni a, mi consumer rights kan violate thei ang bawkin midangte pawn kan rights an rawn violate ve thei a, chuvang chuan consumer rights hi ngaihthah chi a ni lo a, Mizoramah pawh tha zawka consumer rights humhalh anih theih nan FCS&CA department, Consumer Unions, Consumer clubs leh NGOs hrang hrang ten thawh hona tha kan neih  angai ani a ti a. Consumer unions leh consumer clubs te chu consumer rights promote chungchangah state dang leh ram dang tihdan/chindan tha te chu entawn a that viau rualin, midangte pawhin a an entawn theih tur mahni irawm chhuak tihdan/chindan tha ching chhuak thiam turin a fuih a ni. Minister chuan Mizote zingah midangin kan rights min violate sakin, midang pawisawi hlauh vanga ngawihbo pui mai ching kan tam em em a, hetiang hi mizona nilo in mawlna zawk a ni a, mifing chuan ama rights chungchangah mahni inven dan tawk a thiam tur ani a ti bawk a, Consumer Rights nasa zawka thehdarh anih theih nan Social media kan hmanthiam a tul thu a sawi bawk.

He hunah hian consumers te hma ngaia, tlawmngai taka Aizawl Municipal area chhunga 100% LPG Home Delivery kalpui thei hmasa ber leh awm chhun M/S Zothan Indane, Luangmual, Aizawl te hnenah excellent performance in LPG Home Delivery Award chu FCS&CA department chuan lawm takin a hlan a, he lawmman hian Citation bakah pawisa fai cheng singkhat a keng tel ani.

Pi Saizikpuii, Director, FCS&CA Deptt hnen atangin kalkhawm mipuite hnena lawmthu sawina (vote of thanks) ngaihthlak niin, he hun hi tihtawp a ni.