Department of Food, Civil Supplies & Consumer Affairs, Government of Mizoram, India

Dt. 12.02.2026 (Thursday): Vawin khan Food, Civil Supplies & Consumer Affairs Department leh Tripura Natural Gas Company Limited (TNGCL) te bultumin ATI Auditirium, MINECO ah ‘Sensitization Workshop on City Gas Distribution’ hun hman a ni.

He hun hi FCS&CA Minister Pu B. Lalchhanzova chuan khuallian niin a hmanpui a, Pu Pralay Patra, Managing Director TNGCL chu Khualzahawm atan hman a ni bawk.

Pi Teresy Vanlalhruaii, Secretary FCS&CA chuan kalkhawm mipuite lo lawmna hun (welcome address) hun a hmang a, Secretary chuan he hun hlu tak mai TNGCL te nen tangkawpa an buatsaih thei chu lawmawm a tih thu a sawi a. Kum 2047 a India in zalenna kum 100 hmel a hmuh huna vison a neih pawimawh tak mai India chu developed country ni tura hma a lakna kawngah he ‘City Gas Distribution’ hian hmun pawimawh tak a chang a ni a ti a, kalkhawm mipui zawng zawng te workshop hlawkthlak tak hmang theuh turin duhsakna a hlan bawk a ni.

Khuallian FCS&CA Minister, Pu B. Lalchhanzova chuan thla hmasa a Sorkar officials pawimawh te nen Tripura-a an zin tum a an thil hmuh te chu ropui a tih rualin Mizoram tan a rual awh thlak zia thu a sawi a. Kum 30 liam ta kan thlir kir chuan North Esat State te zingah Tripura chu State thang nasa ber a nih thu leh kum 1992 atang daih tawh khan Pipe Line Gas an lo hman tawh thu a sawi a. Mizoram leh Tripura chu state inthenawm an nih angin an tihdan tha te la chhawng ve tur leh nasa zawk a energy lama kan lo intodelh zel theih nan Mizoram Sorkar chuan tha thlah lo in hna a thawh reng thu te, He ‘City Gas Distribution’ hi tum ang a kum 2027 atanga kan ramah hman tan ve theih a nih chuan Mizoram tan thil chhinchhiah thlak tak a nih tur thu a sawi bawk a ni. Minister chuan kalkawm mipuite hnenah he thil hi FCS&CA Department hmalakna chauh nilo in kan vaia mizo mipuite hmalakna, kan zavaia kan chhawr tangkai tur a nih thu a sawi bawk.

Hemi zawhah hian Khualzahawm Pu Pralay Patra, Managing Director TNGCL chuan thusawi na hun tawi neiin, ‘City Gas Distribution’ chungchanga kalkhawm mipuite thu ka chah hmasak ber duh chu engvangin nge? (Why) ‘City Gas Distribution’ hi tun ami system kan hman aiin kan thlan ang tih hi chiang ila, chumi hnuah chauh chuan a tangkai thei ang berin kan hmang thei ang a ti a, India rama energy kan hman tam ber Non – Renewable energy hian kan energy hman zawng zawng 80-85 percent vel a awh a, Sorkar laipui chuan kum 2030 ah chuan Renewable energy atanga energy siamchhuah chu 6-7% atanga 15% a tihpun a tum mek thu leh chumi atan chuan ‘City Gas Distribution’ chu thil pawimawh tak a nih thu a sawi bawk.

Hemi zawh hian TNGCL lama Technical Expert te atangin PPT presentation ngaihthlak a ni a, hemi hnu hian kalkhawm mipuite atangin zawhna leh chhanna hun (interactive session) hlawk thlak tak hman zui a ni.

Pi Saizikpuii, Director, FCS&CA Department atangin kalkhawm mipuite hnena lawmthu sawina hun in he workshop hi khar a ni.

He workshop ah hian Sorkar department-a thawkte, NGOs leh Students te atangin mi 170 vel an kal khawm thei a ni.